फोरलां बाबाजिनिसिम Poem by Dhoni Ram Narzary

'उॅ' खौ सिनायहोगिरि दोरोम जोहोलाव
नोङो जेरावखि थायामानो
गाबज्रियो आं नोंखौ।
नोंनि जिउमाया बोहैहोनाय
गोगो दैमायाव दुगैयो आं दिनैबो।
नोंनोमोन दोरोम जोहोलाव
गुरुनि आगानाव थाफोलांनाय
अनथाय थरसेखौ बोखारनाया।
नोंबोमोन दोरोम जोहोलाव
जग्यनि उखुनदैजों
दाउब' गांसिम गुसलायहोनाया
थलासे अख्रांनि सोमखे जोमैखौ।
नोंबोमोन दोरोम जोहोलाव
जग्यनि उखुनदैजों
जिउ-जिबिनि सोलेराव थाजिम बोलो होनाया।
नोंबोमोन दोरोम जोहोलाव
जग्यनि उखुनदैजों
खनथुम खनथुम थुब्रायना दोननाया
बारजों बिरबायनाय जिगाब गोरानखौ।
नोंबोमोन दोरोम जोहोलाव
जग्यनि उखुनदैजों
सेवब्रुं मोनामनाय मोदोमाव
गोथाव मोदोमफ्रु बिदै सारफावनाया।
दङ हाथरखि फागलाफ्रा नेनानै
नेंनि लानजाथ साफ्रेदावनायखौ।
दङ नेनानै नोंनि थाखाय
थैयाव सोमजिनाय फेनफोना सेरेबफोरा।
आरो दङ नेनानै नोंनि थाखाय
न' बुरिया बायदि बिबारनि लु सुजुनानै।
नों फैगोन गयत्रीनि मेथाइ रोजाबनानै
गुज्रि लानथ' दालायाव बिलाइ रोदोमहोनो
बारदै सिखोलाखौ लानानै।