Date: - 14-1-2016
स्ट्रीट रट सेर सेर आरो खनाखनला जेरावबो
जिब जुनारफोरा लाजिफोनांजादों
मानोना बिसोरनि खसाबफोरखौ गुबुना सेखबाय।
एमब्रइदारिनि आगरबादि रेस्टोरेंटाव
फालोसे दाउफोरा बाथुमफैदों
गुसथियाव माबा फुननानै बायग्रेबनाय थोरसिखौ खिनथिनानै
थुलाबादि साट॔खौ बोहैहोनो बिसोर थालिम होदों।
बेखायनो गावखौनो एमब्रइदारियाव सुनाय जोमखांग्राबादि खालामना
गासिखौबो आनलेद खालामनो नाजादों।
खायसेबा बेफोर हेसाग लाइटबादि दैनि फाखनाव बारसोमफोलांनानै
गांखं बुब्राबनायनि नंखाय नाजानायसो जादों।
बेनि अनगाबो दावमासारफोरा जायगा जायगा थालिम होदों।
ओनसोलनि बांसिनानो बादामालिनि बारि
बेफोरनिफ्राय उरायबोनाय फेनफोनाफोरा
सोरखौबा मनगोलाबफैदों खायसेखौ लाथिखसि लिंबोदों।
बेफरबादि ओनसोलाव दाजेमारि जिबिफोरनि मोस्रोमबादि हानजा सुरनायाबो बाराद्रायथार
जाहोना लालाय होलाय जोंबोलाहोनाय जोंसारहोनाय बायदिफोरनि राहाफोरा बेफोराव बायब्रुस।
बेखायनो माबोलाबा गुब्रुना गेब्रेङोबो।
आरो बेफोरनि खि-हासुदैफोरा गाज्रियै मनगोलाबग्राफोरखौ फेदेरनायाव मदद होदों।
बेफोरनि उदै आरो खर'वाव आं माबोलाबा जायगाबो लाखांबाय।
बेनि अनगाबो ना-बेदरखौ माजि सैमानिफ्राय सांग्रां जानांनायबादि
बैयावबो बायदिसिनानि थाखाय महरसेयानो।
अदेबानि गावखौ सिफि एबा जलंगायाव सोना लानायनिबो गोनांथार
बेव सिगुन सिला सियाल सिख्राबाजि बायदिनिबो आंखाल गैया।
बुंनो थांबोला बेनि दाजाव दानख'नि बुंफुरलुआनो गोब्राब
मानोना इसारा आरो सावगारिफोरा सोलायसलु।
नै बेयोदि गोदान नङा
खारसां सेवब्रुं सिनदां गोजांस्रिव मोनलायनाय माबेलाय!
सि बेथ' सोदोमस्रिनि जुनारसो जानांगौ!
आथिखालनि बायदिसिना महरफोरनि नारानाथानि फिनजाथायाव बिजाउन महरै बेफोरनि सावगारि।
आं बैफोर आबहावानि गेजेराव गावखौ सरसोमनांनानै हां सरथेहां सरथेहां मोनदों
गाबोननि फारसे आमायनाय फैदों
माखौबा गोमानाय एबा खोमानांनाय मोनदों।
बेफोरनि निउकिलियारबादि सोमोथावफोरा आबौबैनि ओनसोलावबो नांस'फैबाय।
बेखायनो बेफोरनिफ्राय जानगारनो एबा जानगारहोनो
आं बेरायहैयो हाथायसालिनि गेजेर एबा खना खनलाफोराव
जाहाथे गासैबोनि गुदिमुवाफोरखौ बबेयावबा बायना मोनो।
This poem has not been translated into any other language yet.
I would like to translate this poem