ꇐ ꏿ Poem by Aku Wuwu

ꀋꈑꃺꃼ
ꇐꏿꄻꏜꁧꇱꄉꇬ，ꏜꁧꋍꑍꒇꋍꑍꀉꄻꀕ，ꇐꏿꄻ
ꋚꂷꇱꄉꇬ，ꋚꂷꋍꑍꋉꋍꑍꁯꅑꆹ；ꇐꏿꄻꐎꏂꇱꄉ
ꇬ，ꐎꏂꇓꁨꎞꃅꎞ……ꇐꏿꄻꉪꇐꇱꈧꐛꇮꇬ，ꇐ
ꏿꄻꉂꏣꇱꈧꐛꇮꇬ……
――ꀊꆨꁮꅉꅂꐛꐙꑟꀕ，ꈌꃮꎓꇙꀕ！
ꃰꊿꈀꐥꌠ，ꀊꆨꁮꅉꈐꏭꄉꇐꏿꋋꂷꎹꅷꀃꑍꑟ。
ꇐꏿꄻꈛꎭꇱꎼꇁꌠꌡ，ꈝꃀꈪꀕꄂꀕꋍꑍꉚꋍꑍꀊꎴ
ꆹ；ꇐꏿꄻꈎꄜꇱꎼꇁꑲꀋꌧꌠꌡ，ꃰꊿꐥꇈꆗꇊꑟꌠ
ꑾꄮꌦꅿꂷꀉꄂꐥꅅꈨ，ꑾꄮꌦꅿꑌꌕꉐꃘꊰꈎꀉꄂꊌ
ꅅꈨ。
ꇐꏿꑍꅝꇬꀉꄂ，ꒉꌤꇬꎷꄷ，ꒈꀮꄷꇉꅝꀋꇎ，
ꒊꃀꒈꌺꅝꀋꇎ，ꎾꃚꑲꆀꌤꁮꃹꄎꄷ。ꀄꂼꌠꀋꉬ，
ꉠꎾꃚꇿꐛꂯ？ꌞꌺꄂꀋꃀꑞꉪꑌꀋꐚ。
ꉢꒉꌤꇬꎷ，ꀊꆨꇐꏿꈍꄮꐂꇁꉠꉌꃀꈐꏭꃹꀋꐚ，
ꉠꇭꀧꈯꄿꇓꊸꃚꅩꍠꀕꂷꐛꆹꄉ，ꉢꒉꌤꇬꎷ。ꑠꄮ
ꇬ，ꐎꏂꍹꐛ，ꋚꁧꌼꂅꇧꁠꌐ。
ꉢꏮꁦꇬꇈꇬꉜꄉꉢꒉꌤ，ꉢꏮꁍꁈꀿꃀꉜꄉꉢꒉ
ꌤ，ꉢꏮꁦꋠꃌꅿꉜꄉꉢꒉꌤ，ꉢꏮꀉꑳꀿꏂꉜꄉꉢꒉ
ꌤ，ꉢꏮꌕꉐꃪꀕꈎꂴꆽꉜꄉꉢꒉꌤ，ꉢꏮꉬꉐꃪꀕꈎ
ꇈꉈꉜꄉꉢꒉꌤ。ꄚ，ꉠꎿꃚꇿꐛꂯ？ꌞꌺꄂꀋꃀꑞꉪ
ꑌꀋꐚ。
"ꇐꏿꐤꄟꉜꇬ，ꇐꌺꋌꑵꑞꃅꑌꅐꅑꑵꉬꌠ"ꌞ
ꌺꄂꀋꃀꑓꁴꌩꏾꁏꃅꁏ。
ꉠꀄꂼꁡꇤꂶꌠꇬ，ꀋꅞꉖꀋꃋꍈꊌꄉ，ꀉꑳꍈꀄꊭ
ꇬ，ꃀꅉꀆꐒꀋꇰꀋꇊꈨꃹꑵꉬꅊꇈ！ꀉꑳꌃꒉꃅꉘꐞ
ꃅꐞꑵꉬꅊꇈ！
ꀋꃋꋋꍈꑓꀋꁨꌦꇯꆐ，ꁡꇤꎧꑱꊿꈧꌠꇱꌌꀋꎪꀋ
ꑴꃅ"ꇐꅐꃀ"ꂓꄉ！
ꑠꄮꇬ，ꉡꑌꁮꅉꃅꄷꈌꀞꄹꀧꂷꐛꆹꇰ！……