Alang Sa Mga Working Mothers Poem by RIC BASTASA

Himoan ko kamo og balak
Halad kaninyo.

Dili ko kini tas-on sama sa
Red carpet sa mga kaslonon

Gikan sa pultahan hangtod
Sa altar sa simbahan.

Sayod ako nga nagdali kamo
Sa kadaghan sa inyong trabaho-

Magpatutoy sa puya.
Magpatutoy pa sa bana.

Magplano sa family menu.
Mag-budget pa sa gamayng sweldo.

Magluto sa pamahaw.
Manghipos pa sa bahaw.

Kutob dinhi na lang lagi ko
Niining balak alang kaninyo

Kay wala na ra ba mo'y panahon
Busa ugma na lang pud puhon.