An Kabanggihon Poem by SALVADOR CENITA

Kagayon kan bangging igwang bituon,
Na nagsisilyab sa likod kan panganuron;
Marhay magtukaw sa may kahoy na marambong,
Ining pagal ko, talagang nabubulong.

Pagkalag-kalag ko sa sakuyang palibot,
Na pano nin awot na grabeng yumok;
Nahihiling ko an kadakol na aninipot,
Naglalayaw-layaw an ilaw purupalsok.

Sa gayon kan huni nin mga insekto,
sakuyang pagdangog talagang kuntintado;
Nalilingawan ko an makamundong tingog,
Nakakatabang na ako nanok mangiturog,

Hararom na naman ining kabanggihon,
Problema lingawan magpuli na sa harong;
An ikakarahay iyo na nguna an isipon,
May agang maabot kaya magtuninong.