Andizazi Poem by Black Consciousness Poetry BCP

Ezasekhaya izinyanya zihlala ngaphantsi kwamanzi
Isanti yolwandle lufefezo lwemfemfe zam
Imimoya yase lwandle seyajika yazizihlwele,
Yangu moya osuka kwizinyanya othi uvelele abo baphilayo ngephupha
Kodwa, ndithe ndakurhabula ibhekile yomsindo wam okomqombhothi ovuzis'amathe
Ndazibona sendi ngahloneli kwantlonipho yenu ngoba, andizazi

Ndibizwa kwilizwe lamathongo
Kuthiwa ndinentwaso, ndinenkenkqe
Ndiluqhanqalazo lwegqirha elingenangqondo
Kuthiwa Ndoyikisa izithunzela
Kodwa ndicamagusheliswa isimanga esingeso sam

Mna Ndibizwa kwilizwe lamathongo
Ndisabele
Bandibuze ungubani?
Ndiphendule ndithi
NdinguPaula
Vumani bo!
Abavuma
Baphinde bandibuze ungubani?
Ndiphendule ndithi
NdinguLindokuhle
Bandibuze ngoobani aba balinde okuhle?
Ndibheka'bheke ndizimele ngaba kulomama
Ndithi, 'ngooTshonyane, ooDikiza, ooSawu, ooCungwa, ooMthuzimela, ooNkomo
Vumani bo! '
Abavumi
Ngoba, andizazi

Ndaziva ndisindwa emagxeni kukubeleke iziduko endingazaziyo
Ndigrumbha amangcwaba ezinyanya zabantu endingabaziyo
Kwalomngxuyo uginya imvelaphi yam endingayaziyo

ukuba bebesazi ukuba
Utata wam usasula udaka olwalunyhibhelwe emehlweni akhe
Ngumama wakhe
Owancumela ecaleni, emva kotyiswa utsiki
Ntsi! Makhulu wasenza kodwa
Ngoku konke okutaka kwisende likayihlo wam liyalehleka
Ngoba ndim lo, andizazi
Ndim lo, andizazi

Mna ndithonga ngookhokho bam
Ngezinye iimini bathyudisa emaswangeni bezinyosi
xa kusila umakhulu
My ancestor's ghosts still grave those grounds
Their restless spirits unfound
Amaxixilili egaz' exhanti anxanelwe isiXhosa
Ndixoleleni mna
Ityala lam kukuzalwa
Ndixoleleni mna, ityala lam andizicelelanga


Mna ndithonga ngookhokho bam
Babhonga bade babhodle ubudlobongela ngumsindo
Ndoba utata katata ngubhuti kamama kamama
Nangona kulomama belivumile eli tyala
Lisaqhinwe ngeqhina likaNongqawuse kulotata

makube kwamngqund' ujuliwe
Ngoba nam ndiyaqhanqalaza
Iindoni zamanzi andisazi thuthi
Andisazinquli, ngoba azindazi nam andizazi

Umsindo wam ingathi unitshonisa nzulu ngaphantsi kwamanzi
Nixel' eNxele
Kodwa ngamanye amaxesha amaza olwandle
Ibangathi zizandla zenu, ezindithyalela
Ngaphandle, kwiphepha nosiba
Ingathi nindikhombisa umzila owashiywa yindlovukazi apho yayihamba khona
Ukuze ndijoje ukuba ndingubani
Ngoba andizazi

Ndikhangela iimpendulo
Ndaqhumisa impepho
Wonyuka phezulu umsi, wazoba indlovu
Isilo saseManqarhwaneni
Ndatsho ndayiqonda ukuba bafuna ndithyile
Inyala laba bandizayo
Yacima impepho
Ndashiyeka ndisaqhunyiwe kungazazi
Ndiyazazi ngoku ukuba andizazi
Ndim lo ndize phambi kwenu andizazi
Ndize,
ndize,
ndize,
ndize…
Wena?
uyazazi ukuba ungubani?


|Lindokuhle Matina|