Ang Akong Nakita Sa Bukid Poem by RIC BASTASA

Usa ka linya sa mga kabaw,
Nagsibsib sa mga bag-ong pinutlan
Nga mga inani nga humay sa likod
Sa usa ka gamay ug biniyaang
Kamalig. Nangalaya ang mga sagbot
Ug napapas na ang mga tunob
Sa mga bata nga manganihay,
Nanguli na sa ilang mga panimalay
Sa daplin sa baybay. Ang nabilin
Mao na lang ang mga tawotawo nga
Nagpakaaron-ingnon gihapon sa
Pagbantay sa mga bulawanong uhay.

Miabot ang mga tulabong nga
Mitugpa sa bukobuko sa usa ka
Linya nga kabaw. Sugod na
Ang pagpanghinguto. Mibalik na
Ang tumang kahilom sa kaumahan.

Naglantaw na usab ako sa lunhaw
Nga wanang. Wala akoy gipaabot.