सहरनि बिखायाव आं Poem by Dhoni Ram Narzary

नायहरनायाव सहरखौ नुहुरदों जोबोर समायना,
हरनि समाव रिथि-रिथा जोंनाय लाइफोरा बांसिन समायफ्ले होदों।
थासारिया जोबोर निरालाथारमोन,
बेखायनो सान गोरलैआव फेख्रायबोदोंमोन
सान राबोनाय लोगो लोगो रोमोबोनायसै।

दायो आं दं सेन्ट्रेल सपिं मल मोखांनि बास वेटिं सिटआव
गावखौ आलजेब्रानि आवथायाव सरसोमनानै।

लामाफोरा गारा मटरनि होंगोदोंगोजों बुंफबनाय।
गारि-मटरनि हरन होनाया
बोहैलांनाय दैमानि सोलास्लिमबोनाय हाब्रांनि गुथाल सोमजिनाय नुखायखौ
अप्सारा हलाव जावले जावले प्ले खालामदों।

आंनि गोमानाय थैसामफोराबो
दाव बासानिफ्राय गोदोना फोलावनानै
खायसेया अन्थाय सायाव गसंख्रोंनानै आरो
खायसेया दुब्रि बिलायाव बागथावनानै मिरौ-जिरौ नायहरदों।

आं मिथिगौ,
बेयो मासे गुफुर गराइनि गोदोनायाव गानहोनाय गांग्रिंनि अनगा जाबो नङा।
नंगौ बेनो मोनसे साबि अख्रांनि राजालामाजों हान्थिलांनाय दरजानि।
जायनि थाखाय आंनि बिबार बारियाव गावलां-गावथां बिबार बारगोन।
बेयो साफ्रोमनिबो हास्थायनायब्लाबो फारागा बेनोल'
खायसेनिया आंनि उल्थायै गावारि जानांगौ।

'फे...फे....ब'
अ हासआ सफैबाय।
आंहा दंबावो हान्थिलांनांगौ गोजान लामा।