Hlabi Poem by madihlare christobeth molapo

O mokgonyana wa dithakga, le mašaedi o kgobokeditše,

Wena mmetli mmetla le ya merupa megopolo,

Ngwana’ matšato setsaroša le ya merupa megopolwana,

O mahlalepepeneneng o hlalefišitše le dišilapuleng.

Boramelao, dingaka le baoki o bjetše wa buna wa go tlala seatla,

Boramahlale bona o boa ka maribana,

Ge e le bafahloši bona, thari o atišitše,

Boraditaba ke motšhitšhi ba hloka le bodulo mmušong.

Lentšu o goeleditše ka lona, lona la poo,

Kgole le kgauswi batho tsebe tša tlogela dihlogo,

Ba kgabakgabiša dikudumela ba lebile kgorong tša gago,

Ba re go fihla wa ba timola lenyora ka tša kgorong ya thuto.

Megolo ya re go koloba ba kgopela leboelela,

Wa iphapanya mmetlašapolatlala wa tšea wa ba nea,

Ba re go metša mahlo a bona seetša,

Ba re ba sa maketše diatla le tšona tša thoma go phopholetša,

Ba re ke metlae megopolo ya ba šupetša dikgolo.

Potšišo ya fofora, maleme a bona e sa emiše,

Go thwe ke ngwana mang yena yo?

Ntumelele ke go hlaloše ba go tsebe

Ka gore nna ga ke go phopholetše ke go itia lenaka,

Wena Hlabi ’a Hlabirwa sehlabišatšathuto.