Ka Hlagolela Leokana, Lare Go Gola La Nhlaba Poem by Kitso Mafora

Motsoga-pele o fela a re 'Madi a Kgaogantšwa ke Thipa', eupša phihlelo ya bophelo e nthutile gore le mothopo wo o tsepamego o ka pšha ge o retetšwa ke phišo ya go hloka tebogo. Le ge kgomo e sa latswe namane e šele, nna ke mo tšeere e sa le lenao le le nanyago, ka kholofelo ya gore ka ge thupa e kobja e sa le meetse, e tla re go gola, ya ba more-mogolo sebipa ‘tšatši le fišago. Ke tšhetše moko wa ‘phelo bjaka ka gare ga marapo a gagwe a ma nanana, ka ba kotse ya gagwe le mofepi, ke dula ke gopola gore motho o buna seo a se bjalago.

Boseeng bja gagwe, ke ile ka ke ntšha sehlabelo. Ke ile ka se le kokonele dihlong ka ba ka fihla lerapong, ke tseba gore pula ga e nele motho o tee, gomme ka kgetha go ba moriti wa gagwe. E be e le thaka ya leihlo laka, ka mo šireleditša dipuleng le diphefong tša bophelo. Le ge ke be ke dumela gore ngwana ke wa mohlakanelwa, eupša ka boikgantšho, ke ile ka leka go ba motse ka moka go yena. Ka abelana le yena bogobe bjaka le diphiri tšaka, ke re ka ge ke mmeile tlas'a diphego tšaka, ke aga segwera se tiilego seo se ka se senywego ke nako.

Fela dihla le mabaka tša biloga bjalo ka bjala bja phiri, ngwan'ola wa lethabo a thoma go galaka bjalo ka lengana. Maatla le boikgantšho yaba modu wa go hwa ga gagwe pelo, a thoma go bona eka go ba gona gaka ke ga pula ya matla-ka-dibe. O thomile ka go itira eka o na le ditsebe tša go kwa fela di thibane ge ke mo eletša, go fihla mo a thomilego go namela lere la tšwelopele ya gagwe ka go nkgatakela ka dinao magetleng. Ke bulegile mahlo ka morago nako ka thoma go lemoga gore ka nnete ke be ke hlagolela leokana. Ka pela-pela, ka morago ga go bona letšatši la katlego ya gagwe, a thoma go ntšhašara ka maroba le matlapa eka ke kgomo ya tšhaledi.

Ruri polawa ke mong ga ena lebelo gomme lehu ke phiri ya bošego. Le ke lehu le le bohloko la go bolawa le go bolokwa o phela ke motho yo o mo ratago le go mo hlokomela, gomme a thoma go go swara bjalo ka mofeti wa tsela goba go feta fao, bjalo ka lenaba. Gape phiri ga e bolele ka mmutla pele e eja, ka gona ka hlokomela gore ka nako tše dingwe go ba botho go na le moputso wa go baba. Ke ile ka mo lebelela ge a be a mpona ka mokotla, a mpha mokotla gape a nhlanogela mokotla, a bontšha gore ruri o ka e gapela nokeng fela o ka se e dire gore e nwe.

Bjale, ke išitše pelo yaka mafiša ka gare ga setu saka, taba yaka ke muši e a tupa, ke gare ga dikgakanego tšaka. Fela monna ke nku o llela teng. Ke ithutile ka tsela ye bohloko gore monapelo ga a tsebje, gomme ka nako ye nngwe, ponagalo ya go phadima e fihla pelo ya leswika. Le ge go le bohloko go mmona a itšhela ka lerole, ke swanetše go amogela gore le tšwa le hlaba le tšwa le dikela. Nna ke dirile karolo ya ka, tše dingwe di godimo ga hlogo ya gagwe, ka gobane go fihla mafelelong, mobe-le-itire o na le letšatši la gagwe, gomme modiro wa motho o a mo latela. Ka nnete ka tla ka hlagolela leokana, lare go gola la nhlaba.