KANA NDAFA Poem by Ignatius T. Mabasa

Kana ndafa
Handidi mariro
Anotaurwa zvakazorwa huchi
Zvichimononoka setsvina
Zvichikuhumuka semazhizha
Aneta kurembera pamuti.
Handidi zvinotaurwa zvichirungwa
Nekupfikura kwechitsotsi, kune skiri
Handidi misodzi yemate
Netumashoko twakakweretwa
Kunhamo dzeburial society
Tumashoko twakati twasu
Tuchipenya kunge njanji.

Imi, kana ndafa
Ndivigei
Maruva enyu handianzwi kunhuwirira
Nziyo dzenyu handidzinzwi pasi pevhu