Kokwembali Yomafrika Poem by Anele Potelwa (Unpublished)

Ngalomzuzu kushukuma ingulo zibhaca,
Ndiyazidla ngobume,
Ndiyazidla ngeengcambu zam,
Ndiqhakraza ndibonisa ngamabal'amnyam'egazi,
Ndixela wona amabala aquke intlalo sithethe,
Ndiluphawu kwisizwe sakowethu,
Ndingumbombo uqhosha kwigugu lakowethu,

Zimbo zam zokuphila zindibuyisela eMbo,
Zikhali zam zokucangcatha amathafa obuhlanga,
Zezona ezazindibuyisela phambi kweMfecane,
kumadangatye atshis'iintsimi zobawomkhulu,
Ndingomnye wabangqishayo ndiqamba ndikhusela ilifa,
Ndihamba ngongqisha ndichula ukunyathela,
kodwa ngamizuzu ndiyanyeka ndikhumbule endulo,
kuba ndiyazidla ngembali yam,

zithi iinkolo zamaxhwithantamo zakugadla,
ndifunz'edabini ndikhumbule amazwi kaNtsikana,
zithi iindlebe zakukhanya zixel'ilanga lakwaSotshangane,
Nditshile mna ndibonise ubumnyama kumthi wegazi,
kuba ngesiko kuvela ibala lam lokuzingca,
kushukum'ingca zingcangcazele zingenamqolo,

ndibonga ukhokho kakhokho ngoluthando,
ndibonga izizwe zezizwe ngezizwe ngalembali,
ndibabaza iinzame zobaw'omkhulu ngeli lifa,
kuba imbali! imbali!
yeyam!