Kuch Mere Jaisa Dikhta Hai Poem by Puneet Choudhary

Naa jane duniya ko kyun wo alag-alag sa lagta hai,
Jab man ki aankhen kholun toh, kuch mere jaisa dikhta hai.

Rang alag aur roop alag, alag hamari bhasha hai,
Jab pyar se wo kuch bole toh, kuch mere jaisa dikhta hai.

Manzilein alag kuch paani hai, raaste alag kuch chalna hai,
Jab unko paane ka junoon dekhun toh, kuch mere jaisa dikhta hai.

Wo kehte hai mazhab alag, alag taur-tareeke hai,
Jab haste gaate dekhun toh, kuch mere jaisa dikhta hai.

Kuch bas sunte rehte hai, kuch sunaate rehte hai,
Jab khul ke baate hoti hai, kuch mere jaisa dikhta hai.

Usko bhala bura kehte hai, kattar kathor hum kehte hai,
Kisi aur ke liye rota dekhun toh, kuch mere jaisa dikhta hai.

Wo jyada kuch kehta nahi, darpok use hum kehte hai,
Jab khud se ladte dekhun toh, kuch mere jaisa dikhta hai.

Itne saare bhed sahi, sau tarah ki baate hai,
Jab ek muskurahat dekhun toh, kuch mere jaisa dikhta hai.

Naa jane duniya ko kyun wo alag-alag sa lagta hai,
Jab man ki aankhen kholun toh, kuch mere jaisa dikhta hai.