Kufa Ndiyakonyanya (Xhosa) Poem by Kwanele Balele

Uyinkunkqela yeChathaza ethatha ingabhungisanga.
Indlavini esimilo sitenxileyo engeva kukhuzwa.
Ndiyayonyanya intliziyo yakho kuba inyhuku-nyhuku,
Ayinamvakalelo okokude iginye neemveku zingenasono.
Uthini ngabazali abashiya usizi lweenkedama,
Zixhaphazeka, zingenamthetheleli ngembangela yakho! ?
KUFA! Ndiyakonyanya!

Indalo iyamemeza ngencwina, nguwe.
Isizwe siyagxwala mbombe zone, kuyingxokolo nje.
Uhlanga luvukelana nohlanga, ngenxa yakho.
Iintsapho ziintsaba zihlaba imihlolo ekhaya;
Ziqulunqelena amayelekenqe okunqunqelana egoqweni;
Kanti uBuntu bakho buyini na, lento ungenalusini na?
Isazela sakho sayaphi na, lento ungenamvandedwa na?
Owu kodwa! KUFA
ndiyakonyanya!