Lakhothama Ilungu Poem by Anele Potelwa (Unpublished)

Zachitheka iinyembezi kwikhaya
Laphela ithemba kubantwana
Yatyikity'amehlo imveki
Yenzwa kukungakholwa kokwenzekileyo

Kwavakal'iintlungu zeengongoma
Zaduduma izijwili kwintsapho
Zabetha okwezulu laseXhongora
Kwe! Cwakwa kungekho mazwi kulowo

Leyo yintlungu yokulahlekelwa
Liphupha elishiy'iinyembezi nezilonda
Kuba zingumqokozo iinkxwaleko kulomzi
Umxhel'ujacekile kwinzukulwana yegazi

Olo sizi lungenatyala alondeleki
Ubone sele kunzima nakwimilowo
Axing'emqaleni ngenxa yokuchaneka
Ziqobozeke iingqondo zamanyange

Kant'uyatsha umthi omanzi
Uyadwanguza wona umthi owomileyo
Latshona ilanga kumthonyama
Yadana intliziyo kumthinjana
Yini na, bekutheni zekube nje?