Mentol Poem by Genesis Bedio

Ang panghupay sa panglawas nga sakit ug…

Mupaak sa panit sa dihang imong ibanlos
Sa ulo, dughan, likod og sa diing parte sa lawas
Nga gipuy-an sa kasakit ug kalisud

Apan kay bugnaw kini
Angay gyud sa nagkayo ang kaunoran og balatian
Tungod sa pagpahimulos sa unod ug kusug
Angay usab sa naay hilanat ug ubang kahasol sa lawas
Tungod sa kaugtas!

Kung lana nga mentol - maayo nga panghilot
Kung murag tiger balm - nindot ilanghab ang alisngaw
Aron mawagtang ang kabuhi dala sa makalipong nga dagan sa panahon

Maayo man sad kung kristalon unya gihimong balisungsong ang porma sa mentol
Kay kini gahi ug pwde inudnod sa lawas
Aron maduot ang pamaol sa kaunuran og mapiit ang mga ugat sa suliran

Mupakalma gyud ang mentol
Mualibyo man sab ang paminaw
Kay gani analgesic kuno

Apan sa tinud-anay ang kabintaha ug kagaan sa gibati
Mubalik usab sa pagantos ug pagpailob
Bisag kapila banlusi ug mentol
Tungod laglom diay ning sakit ug balik balik kang mahiagom

Busa ibanlos ang mentol
Unya damha ang kabugnaw niini
Dimdimi samtang naa pay talab
Di lang masabtan nga ang mentol
Muhuphop sama sa paghuphop sa kaharuhay
Sa walay kataposang angoy sa kinabuhi