دوماهی ئێڤارێن شێتبوونێ Poem by Mllat Mohammed

دەمێ دەڤێ پەیڤان ژ ئاخێ تژیبووی و
هناڤێن لاپەڕان زۆهابووین،
پەیڤەک ما بو دناڤ برینەکێ ڕا!
لێ ئەڤرو کەسەکێ ژ ژیانێ تێر,
ب بەهانەیا قارەمانیێ,
خوە هاڤێژتە د دەڤێ ئاخێ دا و
ئەو برینە داخکر!
ژ وێ ڕۆژێ و پێدا،
ئێدی چ کەسەکێ نەشیا دەڤێ ئاخێ بگرت,
هەر دئاخڤت چ کەس ل زمانێ وێ تێنەدگەهشت؟
هەتا دوهی ژی ژ ئەگەرێ ل ئێک تێنەگەهشتنێ
ل بەرسینگێ ئاخێ ،
شەهیدەک نڤستبوو! ؟
ئەوێ ژی, لایێ لایێ یا مریان بو دگۆت،
هناڤێن وی تژی دکرن ژ شەڕابا ڕەش!
هێشتا ئەو تێهنییە و گازی دکت؟
لێ مێرخاسێن دوهی،
ناسیونالیزمێن دوهی،
نوکە ل سەر جادەیان بیرهاتێن خوە د فروشن!
هندەک ژی وێڤەتری وان پارسەکیێ دکن!
یێن تێربووین ژ نەهامەتیێن ڤێ ئاخێ! ؟
ئێدی ژبەر دووبارە باسێ ژیانێ دهێتە گۆتن
هەر ئێڤار ل بەر دەرگەهێ چایخانەیێ،
شێتەک سەرهاتییێن خوە ڤەدگێرت و خەلکەک ب خوە دکەنت! ؟
هەر ئێک ژ مە ب دەهان جاران د ئەزموونا شێتبوونێ دا بێ هۆشبوویە ،
بەلێ ڕوویێ خوە ڤەدشێرین و
دگەل ژیانێ بێدەنگ دبین!
سەرێ مە گران دبت و
ب وەستییایی و سەرشۆری دەستێ ژیانێ دگرن
دەستێ ئاخا خوە دگرن،
لێ نزانن بۆ کیڤە بچن؟
دەمێ ل دویڤ یا د سەرێ خوە دا دچن
د ڕێکێ دا تشتێن سەیر و بتڕس دبینن,
وەکو نەهەنگانە ب ڕێڤەدچن!
وەکو بەڕازانە، ل سەر پشتا عەورا بەرەڤ مەڤە دهێن!
ل بەرانبەر وانا،
ئەم دبنە هندەک نەورەسێن شاپەر شکەستی و
پەڕێن مە ب تەڕازییا ژیانێ ڤە د هلاویسن! ؟
لێ پشتا یەکسانیێ یا شکەستی،
ئەو دبێژن: بارێ گران نەشێت هەلبگرت و
یێن سڤک دگەل بای دفڕینت
شاپەرێن مە دشکێنن و دبێژن بفڕە؟
دلێن مە پارچە پارچە دکن و دبێژن سنوران دەستنیشان بکن
ئێدی زکێ دادیێ یێ تژیبووی ژ نەدادیێ،
دخوازت بهلاڤێت و سنوران داببەزینت
هەر ئێک ژمە تەمەت خوە ژ نەدادیێ داگرتییە،
بەهشتەک د سەرێ مەدا یە و
د دلێ مە دا دوژەهەکە،
دوژەهەکە ب ڕەنگێن ئاخێ
ڕۆحامە وەکو شاهـ سوارەکێ
ل سەر پشتا هەسپێ قەمەر خوە باددت و
ل دویڤ سەڕێ خوە دچت
بەلێ کەلەخێ مە ل گوڕەکێ دگەرت خوە تێدا بحەوینت،
لێ گوڕ یێن هاتینە هلاویستن! ؟
نەشێن بفڕین و ل دویڤ ڕۆحا خوە بازبدن
نەژی دشێن پێیێ ڤێ ژیانێ ل سەر سینگێ خوە ڕابکن.