گوڕستانا گولبەڕۆژان Poem by Mllat Mohammed

ھوین بەرمایکێن ڤێ زەڤییا هشک و هۆلا دبینن،
هەتا دوهی،
ل نشیڤ دلۆپێن بارانەکا بێتویتە و
ل هنداڤی ھەلامەتێن هەوری دا خوە باددا و سەمایەکا بێتابەت دکر؟!
ئاها ل وی دەمی،
بالندە ل ھنداڤی سیبەرا خوە دفڕین
کەڤلۆژانکێ رۆژێ قەرسی بوو،
مستەکا رۆناهیێ رشتبوو ب داڤێن پۆرا وێ ڤە
ئەوێ ژی، سنگێ خوە یێ بەردەلانی کرە کەلهەک و نەدڤیا رابوەستت
دا بەرمایکێن خوە یێن کو بۆ من مایی نەبینت.
هوین ڤی ریباری دبینن؟!
دوهی، دەڤێ وی زوها ببوو ژ تێهنا دا
چو رێڤنگ نەبوون، فرەکا ئاڤێ ب دەڤی دا بکن
بەلێ ئەڤرۆ حێج بوویە و ل چو جهان راناوەستت!
هوین ڤێ مەملەکلەتا خودێ ژێ ستاندی دبینن؟!
سەرێن بێ مرۆڤ گرێلە دبن
مرۆڤێن بێ سەر دەستێن وان د بەریکان دایە و پیاسا دکن
ل چاڤکەوان، گەردەنگازان، کەماخ کیڤریشکان دگەرن
هزر دکن دارستانە و کەڤنە زەمانە
نە دەنگان دبیهسن،
نە رەنگان دبینن و
نە ژی دخوینن!
هوین ڤان کاڤلان دبینن؟!
ئەڤە دویکێلا گولبەرۆژانە ب دیواران ڤە بوویە هێما
بیرا بێژنێن سەدێ بیستێ دهینن بیرا ژبیرکرییان
ئاها ل پشت وێ دویکێلێ
زەراقا تاڤێ بوویە خەنجەرەک و ئەردێن بێ خودان دکێلت
ئەو پرتکا ئاسمانی ل هنداڤ، قەڤز بوویە
ئەو پرتکا عەوری ژی دکوخت،
کەس نەمایە تەپا ل پشتێ بدت دا بهلاڤێت!
هوین ڤێ ئاخێ دبینن...
نە ئاخە نە خوەلی یە،
کی دێ سەرێ وێ شۆت و جەنابەتێن ئاماسێ و لۆزانێ ژ سەر راکت؟
هوین ڤان کەلەخێن کیفکویی دبینن؟
ل بەندا کفنەکێ سپی ماینە،
نزانن دویکێلێ رەنگ نەهێلاینە!
هوین ڤان گولبەرۆژان ژی دبینن؟!
ئەو شاهدن
هەمیێ دبینن
و دگەل هندی مەزن دبن
مەزن دبن،
و دزانن دویر نێزیک،
سەرێن وان دێ گرێلە بن!