Mo Tlogeleng (Sepedi) Poem by Enos Motaka MALATJI

Ye e phethegilego lehono thato ga se ya motho,
Ruri ke thato ya mong wa dithato,
Gore lehono e be wa bolena a fularago,
Go mo rata le a mo rata fela ge a tloga go ka gana mang?
Naa ke ofe wa lena a ka go olela meetse ao a tšhologilego?
Le šwahlile molomo ntšu la kgoši, le ageleng legora.

Tša fase le di mo šitiile, di mo hlotše,
Ka gona o hlomphile pitšo ye a e amogetšego,
A gomarela tsogo la yeo a mmitšago,
A se kgone go feama go fihla le lengwe le hlaba,
Matogo le dipeakanyo a di šia di le magaola
Ya ba gona maikutlo a lena a šutha madulong.

Ga re gane o sentše ka go se laele le ge ele ka bolwetši,
Gobane mohlomongwe nkabe le ile la emaema le yena
Fela ge go phethegile banabešo, ke phetho ke tuu!
Bjale llelang fela go kgebiša pelo sekgophi
Ka morago le mo tlogeleng, a rume 'eto la gagwe.

Setu sa mohu se baka lešata kgopolong ya morati wa gagwe
Fela tše bjalo re phela le tšona, le lena le ya tseba.
Lehu ke ngwetši ya moithaopi.
Ešita le malapeng a dikhorane le a šwahlela.

Homotšegang ga se mathomo ka lena,
Lahlang ngana ka ntho gomme bohloko bo fete le mare
Le mo lokolle a tšame a di bona,
Ka gore go beng gona mo a ilego ke boyabatho, go ya batho.
Bjale ge! mo tlogeleng.