Ngiyokwambulela Kwenginakho! Poem by Sizwe A Zungu

Gxumek' ifuku lakho kulolu dadawe,
Udl' esitshen' engidlela kusona,
Um' uswel' unane, ngizokwabela
Um' uhlwemp' uboleke ngizokwambulela.
Ngibiz' ngowenu, ngizokuteketisa ngowethu.

Xhum' isihlonti kuleli kloba,
Wokhel' emlilwen' engiwothileyo,
Uma kucish' ungazise ngizokwabela,
Um' ulambil' ucaphun' esitsheni sami
Ngibize ngomnewenu, ngizokwamukela.

Ngizokwabela kwenginakho, ,
Ngikuzwe ukhala phakathi kobusuku,
Uqhuqh' okomhlang' exhaphozini
Ukhala ngenkengan' esiswini
Ukhala ngamakhaz' emzimbeni
Bengith' uyantela, lokhu kusa kusa.

Engani wena kwakunguwe nguwe,
Wawutelebhel' okwenjoman' umsila bheka
Ungibuka ngelentshoz' usikisa
Ungibiza ngamagam' ubukisa
Ungincisha nomphem' uqanganisa.
Kodwa min' angibonaze ngaqalekisa...

Cha buy' ungajokoli
Xhum' isihlonti kuleli klob' ubase
Um' uswel' unane ngizokwabela kwenginakho,
Gxumek' ifuku kulolu dadawe,
Uma sewulambil' ungibize, ngizokufunza
Laph' usuhlwemp' ungitshele,
Sengiyokwabela kwenginakho.