Nkamogeleng Poem by madihlare christobeth molapo

Ke ngangabaditše molala ke a gopola,
Ka gana ya mathumaša nnang,
Ke ila go lebelela ditlalemasa
E le ge ke ikgwerantše le swele le megabaru.
Di be di gotla leboelela digotlane tša Mokgadi,
E se matepe tlala e ba hloriša meloma e ila,
Monola e gwerilwe ke bosehla
Boratwakebopokolo.
Mokgadi megokgo e ometše dithangwaneng,
Ya be ya mo paleša magotšane,
Nna ke le legukubje ke thwetše tsholo
Mokhoro wa lapa la Mokgadi
Ke kgobokeditše ka moka.
Phetho a fetogile wa leobu matšatši,
Phogole le kgoši ga a sa tla go tamiša,
Tsholo e ntšwile ganong,
O ipoeletše maropeng morwa’ Sekwati.
Nong ya go akalala fase ke buragane,
Tlala ke ngwetši ya matepe lapeng la ka,
Dikgopo ke matšoba mmeleng wa ka,
Ke fetogile setlošabodutu sa baagelane,
Le bophiri ba nkgerula ba sa emiše.
97
Mphuthaphutheng Batau,
Thuto ke rutilwe ya go iša badimong,
Nkamogeleng Tau tšešo,
Ke ngwanaphošadira se nhlabeng ka marumo,
Ke boile ka gae le mafotwana a ka,
Sehlagana sa ka se llwe ke mollo,
Nkamogeleng hle!