Ouderwetse Tantrum Poem by Lola Sanchez

Miskien as ek 'n ouderwetse tantrum gooi
'n goeie ou vloer moer,
so op my amper-ou-dag
sal ek weer die woorde vind,
en weer kan hardop lag vir myself,
die wêreld en my omwenteling om die maan.

As ek weer rondomtalie spin
tot my asem op is
en my hare los val
sal ek weer my vlerke vind
my kop dronk word op die suurstof
en my gedagtes opgee

As ek aan hou draai en draai tot my asem
vassteek aan my bors
en my sweet afdrup tot op my bo-lip
sal ek myself weer ontmoet

As ek hande klap terwyl ek spin
en my voete stamp
sodat ek die aarde groet
sal die vibrasies my herinner

en wanneer ek neersyg tot op die grond van die saligheid
en my asem terugkeer huistoe,
my voete kla van genot

dan sal ek onthou
dat ek opgestop is uit stories en woorde,
musiek en sterrestof
...net soos almal anders.