यावे, स्वागत आहे! Poem by Rajeev Deshpande

दशदिशे कडूनी अनाहत निनाद असतो
क्षितीजी अवनी नभाचा संवाद असतो

प्रपात झेलण्या आतुर पर्वताकडा असतो
मातृभूमी वरती प्राजक्ताचा सडा असतो

पूर्व पश्चिमेस रविराज खुलवित असतो
चांदराती शशिराज भान भुलवित असतो

नगश्रृंखलांचा गुंफला कंठीहार असतो
कंच हरित तरूलतिकांचा श्रृंगार असतो

संमोहण्या चक्षुंना अथांग सागर असतो
शैवालात किनारी बहुगुणी आगर असतो

अंबर धरतीचा सदा समर्पित मेळ असतो
षड् ऋतुंचा पाठशिवणीचा खेळ असतो

ऋतुराज निसर्ग नटराज नटवित असतो
टवटवीत दाट वडात चिवचिवाट असतो

बांग वेळ सकाळ कुक्कुट पाळीत असतो
पात्यांना सैरभैर वात कुरवाळीत असतो

मंद झुळुकेवर स्वार ओला मृद्गंध असतो
यत्किंचित तया पुढे तो निशिगंध असतो

आशिष देण्या सत्वर सांब भोळा असतो
दधीनवनीतावर गोपाळाचा डोळा असतो

निसर्ग उधळण मुक्त आनंद मेळा असतो
भूलोकी जीवन देवदुर्लभ सोहळा असतो!