The Gowk Bird (Scots Cuckoo) Poem by Sheena Blackhall

Balquhidder hotters in the heat
Sun's a gowd baa rowed up wi oo
The glen's a quaich far burn's rin swete
The gowk bird sings cuckoo cuckoo

A calfie heists his knobbly heid
His mither bells a saft balloo
In neuks a heeze o midgies breed
The gowk bird sings cuckoo cuckoo

Struck tunin forks are reeshlin aiks
There's nae fause note here. Aa is true
The lintie lilts, the paddock craiks
The gowk bird sings cuckoo cuckoo

Hyne frae the traffic's din an birr
Hyne frae the city's steer an styoo
Tod pairts the girse, winged spurgies whirr
The gowk bird sings cuckoo cuckoo

It kens the fowk fa veesit here
Will vanish like the fleetin dew
Each hoose o flesh maun disappear
The gowk bird sings cuckoo cuckoo