Tinikangan Poem by Jessica Bioco

Sugad han aton na hin daras-an,
Pinaka-makuri gud an pagtikang nga ngaran.
Malipong ha ulo, ka makahurubya pastilan —
Kay malubog pa an panan-aw, han gin susulsog nga dalan.

Tinikangan it magdidikta kun pauunanhon mo.
Tikangan mo ngani hin sayop, diri ka magmamalinampuson sigurado.
An tinikangan amo an mag gigiya ha imo
Dida ha kaburubutngaan, tubtob matapos mo.

Yana nga takna, kun may ada ka karuyag tikangan,
Ayaw kahulop ngan ayaw gihap kalisang.
Huna-hunaa it mga importante nga rason kun kay ano ka magtitikang.
Himu-a iton nga inspirasyon updi hit kanan Diyos larang.

Ha imo pagtikang, diri karuyag signgon nga matatapos mo dayon.
An imo mga panuyo, diri karuyag signgon nga makukuha mo dayon.
Halaba an proseso ngan magkuri an imo pag-aagian —
pero, ayaw hiton kabaraka, it importante imo na natikangan.