To Carlo Poem by Issa Alejandrino

Hindi namin sasabihing 'paalam'..dahil para sa amin, ikaw ay laging mananatili sa aming mga puso. Lagi kang magiging bahagi sa bawat kasiyahan na aming gagawin. Sa bawat tawanan at sa mga kulitan. Gusto naming buhayin ang mga sandali na kasama ka. Magmukha man kaming mga tanga...ayos lang. Tanging ikaw ang sadyang importante sa amin.
Paulit-ulit naming aalalahanin ang mga oras na pinapasaya mo kami. Ang mga sandaling ikaw ang nagiging pasimuno ng kulitan. Ang pang-gugulat mo sa kalagitnaan ng trabaho. Ang pagsayaw mo ng 'Jollibee Dance' at ang walang katapusang mga linya mo na sadyang nakatatak na sa aming mga puso.
Patawarin mo kami kung hindi ka namin magagawang bitawan. Alam namin na nasa masayang lugar ka na...pero, ang gusto namin ay maging bahagi ka ng bawat araw namin.
Sadyang ang ngayon ay hindi na kailanman magiging kahalintulad ng kahapon. Magawa man naming muling tumawa, hindi na ito magiging katulad ng pagtawa namin noong narito ka. Sa maikling panahon na nakasama ka namin...kulang na kulang pa ang mga salitang ito para ipahayag ang aming pagmamahal. Kulang na kulang ang mga linyang ito para malaman mo ang kalahagahan mo samin.
Totoo nga na malalaman mo lang ang importansya ng isang tao sa oras na wala na ito. Malungkot mang sabihin, ngunit ngayon lang namin ito napatunayan...nang mawala ka. Kaya nga, kung magkakaroon man ng 'replay'...hindi namin palalagpasin ang mga oras na kasama ka.
Ngayong man na hindi ka na namin makakasama. Hindi ito mangangahulugan na hanggang dito lang ang mga alaala mo sa amin. Hindi ka man namin muling makakasama, pinanpangako namin na lagi kang kabilang sa mga kasiyahang iyon.
Mahaba pa ang aming tatahakin...at marami pa kaming mga makikilalang mga bagong kaibigan. Marami pa kaming mabubuong ala-ala. At marami pa kaming mga tawanang magagawa. Ngunit, magkagayunpaman...ang mga ala-ala na kapiling ka ang mangingibabaw sa aming mga puso't isipan.

Carlo... saan ka man narooon, dalhin mo ang ating mga kulitan, tawanan at ala-ala. Mahal na Mahal ka namin...Kaibigan.


-Team Cren