TRÉIGTHE Poem by Louis De Paor

Nuair a bhíonn tú as baile
géaraíonn bainne úr sa chuisneoir,
dónn tósta uaidh féin,
balbhaíonn an guthán
is cailltear fear an phoist
ar a shlí chun an tí.

Cruinníonn Mormanaigh is Finnéithe Jehovah,
an minister is an sagart paróiste,
bean Avon is fear Amway
le chéile ar lic an dorais
chun m'anam damanta a dhamnú.
Ní fhéadfadh Batman mé a shlánú.

Plódaíonn sceimhlitheoirí is murdaróirí,
maoir tráchta is cigirí cánach sa chlós
ag pleancadh ar an bhfuinneog iata,
ag sceitheadh mo rún os ard
leis na comharsain chúiléistitheacha;
ní chuireann mo pheacaí coiriúla
ná mo choireanna peacúla
aon iontas ar éinne.

Sa doircheacht mheata bhalbh istigh
fáiscim do chumhracht
as bráillín fhuar,
cuardaím camán Chúchulainn
fén dtocht riastrach
cnapánach.