Umkhombe Wesizwe Poem by Anele Potelwa (Unpublished)

Vityooo! -oo!
ndingoyena mkhombe wesizwe,
umkhombe kwimikhombe yentlabathi,
Bath'ooMqhayi kuqhaqhekile,
zith'iinkqayi kunkqonkqekile,

Vityo! -oo!
Yavungam'imimoya ngamandl'onke,
ngomthamo yandishya mna ndimi nkqo,
ngenxa yezigaga zam ndingqisha,
ndisel'amanzi intloko ndijingisa,
zabhong'intlosi zakundibona,
zanengcwangu ngogcwabevu olunengcongo,

Ath'akuvel'amaqishil'engqeshweni,
Zefotyololo izizwe!
Ishuu! -uu! -u!
ndlebe zam zinconyiwe,
kuba zingo ngqo abagcotyiweyo,
zindikhokhel'emadlelweni,
zivuleka xa kanye ndizungezwe lutsha!
Ndim! Umkhombe Wesizwe!
Iyhoo! -oo! -o!
Ndim Umkhombe Wezizwe!
Iyhoo! -oo! -o!
Ndingumkhombe Kwimikhombe,

Ndlebe zam! !
Mehlo wam! !
ath'abon'iingcinga zomzingeli,
ath'alozel'iinkabi zintlitheka,
ndaziwa ke mna ngabo bandiziyo,
ndithozama ndichul'ukunyathela,
Huntshuu! -u!
bubazil'ubuso bam,
ngobona buhle bendalo, boyikeka ingakumbi kwezomfamakazi,
zithi zakubona mna ziwagqume amehlo wazo,
Ndimkhombe! Ndingumkhombe!
Ndimkhombeee! -ee! -e!
Wesizweee! -ee! -e!