Uncwadi ❤️ Poem by Lunga Legwaba

Amazwi akho aluncuthu mazangwa, ayanambitheka.
Ilizwi lakho luchulumanco noxolo emphefumlweni wam,
Wakundimbambazela ndiziva njengosana lukunina esifubeni,
Umoya uyazola, uxole, ndithuthuzeleke bubukho bakho.

Ubuncoko bakho buyachwayitisa,
Ubuncoko bakho buyancumisa,
Ubuntyilo-tyilo bakho bobentambanani,
Thekwanendini ndiwahlome kuwe amehlo, xhentsa!
Chulekazindini elithe chu ngcembe nochulumanco,
Ncokola ucikoze mntakwethu, ndikuphile indlebe,
Civotha undichubele msakwethu, ndimamele.

Xa ukufuphi kum kunkqenkqez' iingqele zobusika,
Xa ukufutshane nam iinkqwithela ziyasombela isinqe,
Uzilekese zomkhuhlane, iziko lam lamalahl' abomvu.
Ah, Mbawul' egadlel' irhawule!
Ndiziva ndifudumele ingaba yingubo yothando kusini na le?
Ewe, ngeyothando ingubo uyandombesa.

Kowu, ndizibhaqa ndifathula kumathaf' amathamb' engqondo,
Umlomo usengozini yokukrazuka,
Monwabisi womphefumlo wam wohlala usenyongweni,
Uvalo lungongoza ngamandla ndakukolama,
Mvakalelo in na le iphithizelis' ingqondo?

Okwezikhukula ukhukulisa uloyiko, umvandedwa nonxunguphalo,
Okwemvula yehlobo unisa idyudyu nolonwabo,
Ulizonyo lam lokulila kanye nelokuhleka,
Mthuthuzeli womphefumlo wam, ndiyakuvuma,
Themba lam lokugqibela, ndiyakuncoma.

Si, luyintoni na ke uthando ngaphandle kwezenzo?
Undalathise, wandazisa ndagqibela ngokuqonda le nto ngobunto bayo,
Njengomlilo wedobo oluthando luyanwenwa,
Okweentyantyambo, uthe gqolo ukulunkcenkceshela,
Emazantsi entliziyo luyahluma, luyaphuphuma.

Intliziyo iyazika rhoqo kwakungqamana amehl' ethu,
Unguvimb' oquleth' ububele obucwengileyo nobutyebileyo,
Ngcaphephendini yengcungela ukobopha amanxeba am,
Bendikuqwalasele, ndikwakhel' umkhanya phantse yegqitha ngelosi,
Thambo lamathambo am, ezizweni undithabatha undibeke!