Washiywa! Poem by Anele Potelwa (Unpublished)

</>Nindishiyelani ngcamango zam?
Nindishiyelani ngcinga zam?
kulengqela yothando olumasikizi,
kwintsuma-ntsumane yentlal'enosizi,

kulendlala yokuty'umvubo ongenabisi,
ndishiyelwani koluhambo lungenamzingisi?
kobu bomi bentlalo ephenjelelwe ziintsikizi,
kwezingxaka-ngxaka zam zizele ngabathinzi,

Undishiyelani thando lwam?
Undishiyelani bubele bam?
kunxunguphalo lomdlal'ongenalo ulonwabo,
aph'isiyalu sibetha ngeenzwane zonwabo,

suke ndaxel'inja ingenawo amazinyo okukhukhuz'ithambo,
suke ndaxel'intaka engenako ukuwuwela umlambo,
suke ndema ndanqatyelwa naziintyatyambo,
ndiwenzeni na umhlaba wamakrot'aseMbo?

Undishiyelani ngqondo yam?
Undishiyelani na ntliziyo yam?
kubunzulu besiziba endiswela kuso umhlanguli, kobu bunzima bokunyuk'iinduli,

ndisheyelwani na ndingenguye umdlwenguli?
ndakuhlamba nini na ngentelezi?
umnqayi wam mawenjenjiya ukuvul'itasi,
mayide itsh'ingulo zibhaca ndibe yingelosi!