जिउनि सावथुन: फेलेंनिलामायाव Poem by Ringkhang Basumatary

नुसहरै
मोनथिस'हारै
लैथोमानि गेजेराव,
सानस'हायै
मोन्दांस'हायै
सानबोलावरीनि गेजेराव,
सामलायख'हायै
बाहुंखानि गोब्राब बार!
बुखारजाबाय सोलेरा
बुखारजामारबाय
गोब्राब फाखननि गेजेराव |

आद्रा थाबाय
जिउनि सानरेब
सुजुनाय मिजिंनि,
आद्रा थाबाय
जिउनि लामा
गोर्बो सिमांनि,
बुजिस'मोनै
सायखंनि उल्था मुलुगाव!
आन्दायबाय नोजोरा
आन्दायमारबाय
फावथिनानि सायनासालियाव |


सिग्लाबजाबाय
फेलेंनि दैथुन
बोथोरनि हान्थिनायाव,
लोमसावजाबाय
बोहैलु दैथुन
दाहारनि नारख्रेबनायाव
सानख'हयै
हाबिलासनि सोरां फुंखाया
जोबलांनो हमबाय
जोबलांमारबा
बरफ बायदि आवलिमारबा |