सोमखोर गामि दुब्लि दुब्लि
दुब्रि हाग्रानि आलि आलि
आगान होजेनो जेबोला,
बबेबा रुगुंनिफ्राय-
रोमै रोमै सिफुंनि देंखो
अंग' सोलेराव रिंखांफोयोबोला;
गोसोआ जायो हांखुर
लैथो गुथालाव गोजावफानो |
जिरि जिरि जिनजिरि
दैमुनि दै बोहैबोला,
उदां अखोरां खाथि खाथि
दावसिन-दावलाया बिरबायबोला,
सुग्लायो! गोर्बोआ हालो-दैलो
सानखांना खुदिया बै समनि-
आमोल-दिमोल मोल मोल
रैरुब बिदिन्थानि स'लबाथा |
अर'नबारि गेजेर गेजेर
गंगिना दैसानि सेर सेर
खोलो-खोलो सुदेम बार बारोबोला,
मिलौदो गारांनि, सोरबा सिखोलानि
मेथाइनि ख'बाम जावरियोबोला;
बेरखां फैयो फारि फारि
हादर हालामनि बिखायाव-
हाबिलास जिउनि गोथार फुंखाया |
सोनाब फैसालिनि दोबैहां दोबैहां
हरै मारुंनि रोमोहां रोमोहां
बुब्लिनि बेलारोम गाबा सोलोयोबोला,
खोमसिनि आन्दोआव, नखोरां मुलुगाव;
जोंब्लावरि हाथरखि-हालाया
हायनानि सोरां बिलायोबोला,
दख्लाबसे अबंनि आइनायाव
हास्थायो! रिफिबायथानो जिउमाया |
This poem has not been translated into any other language yet.
I would like to translate this poem