Bidindra Basumatary

Gold Star - 5,269 Points (Bhatopara [13/04/1997] Panbari, Bijni)

सोरथो सोरखौ मा बुंनो - Poem by Bidindra Basumatary

सोरखौ सोर मा बुंनो
राजा जानोल' हुरा हुरा
होख्रावो गोरा गोरा
मासिया मोनब्ला बावबाय
गारामाया थसेब जाबाय
सोरथो बुंदों-
सोरथो बुङाखैमोन
फोरजा जाना थानाय समावलाय
बयबोसो बुंदोंमोन जुजिदोंमोन।
बोरो माथो दिनैलाय गैला
गारामा देरगालायनाय हब्रानाया।
मा जाखो?
बुङोल' बुङोल' बयबो बुङोल'
बिमा रावजों सोलोंथाइ होसो
नै माथो आदाराम, गयाराम, आयाराम
आलाइस्रि मैनास्रि गयस्रि बिबारि
फोरोंगिरि दैदेनगिरि थुनलाइगिरि दोहोनि
होसोलायदों मालाय गुबुन बिजोंआवसो
बिसोरनि बिबुंथि खोनासंना
गामिनि गोरिब दुखुथिया जामबा जामबि
नाब्ला मेब्ला हंला हालां मोनहा
सोमबे हंले नाब्ले गायदे मोनहा
हरबाय फोथांनो बर' राव
बायला-जिला फरायसालि बर' बिजोंआव।
बिसोरखौलाय दिनै सोर नायसनदों
बिसोरनि दुखु सोर मिथिदों
मेगन मोदैखौ सोर नायसनदों।
बिसोरनोथ'मोन नोंसोरखौ राजा खालामनाया
बिसोरनोथ' हारिनि खौसेथि लुबैग्राया
बिसोरनोथ' बिमानि मोदै हुगारनो सिगांनाया
बिसोरनोथ' हारिनि अलंबार नागिरनाया।
सोरथोलाय बुङा-
गुबुनारि हाबनो मोना
सोरथोलाय बुङा-
गुबुनारिजों भ'ट गेलेया
बयबोसो गेलेदों
बयबोसो हाबहोदों।
दिनै सोर भुगिनांदों उदिस लारोंदों?
बर' हारिनि निखाउरि फिसायासो।
सोरनि थाखाय दाङाबाजि हारियारि
नोंसोरबादि राजानि मासि सेलायनायावसो
नोंसोरबादि आखुआवसो।
माब्लाथो बुङा सोरथो
बर'हा खौसे गैया
बर'हा खौसे जानांसिगौ
अब्लालाय मानोथो अननो रोङा गुबुनखौ
अब्लालाय मानोथो निमाहा गैया
अब्लालाय मानोथो बोज'बना लानो उदायरोङा? ?
दिनै नोंसोरबादि अनलायनो रोङै
गावजों गाव गेजेन जालायनो रोङै
मासिनि थाखायल' सानग्रा दैदेनगिरिफोरनि थाखायनो
गामियारि जाम्बा-जाम्बि आइ-आफा आदै-मादै
आबै-आबौ, आमाइ-आनै बिदा-फंबाय गावजों गाव
गोजोन गैया जुगुमलायनाय गावस्रालायनाय।

Topic(s) of this poem: question


Comments about सोरथो सोरखौ मा बुंनो by Bidindra Basumatary

There is no comment submitted by members..



Read this poem in other languages

This poem has not been translated into any other language yet.

I would like to translate this poem »

word flags


Poem Submitted: Tuesday, November 17, 2015



[Report Error]