जाख्रिसे अखा हालांथों Poem by Bidindra Basumatary

लामा-सामानि हाद्रि-बाला बिरफुंनाय
हाखा-दावरा गन्थं-खुगा हमथेबायनाय
देहानि फारसे खहा
बेनि थाखाय हाफैथों
जाख्रिसे अखा हालांथों
बेनि थाखाय एसिड अखाब्लाबो जाथों।
-
रानज्रिंनाय रोमोनाय आबाद फसल
उखैनाय गांनाय सुफुंनो मिजिं खन्थुमनाय
गावनिनो आखाइयाव गाव सोनारनाय
बेनि थाखाय सिरिथों
सिरिलांथों जाख्रिसे गोथार अखा
नङा बेनि थाखाय एसिड अखा।
-
नैबे सिदलानि नायथावा-जाथावा थै
खारलिं-खारथिं रान्थाबसोना दं
जाय गोजांस्रिवहोदों
आरो मोनामनाय बिजाउनाव दं
गेस्ट्रिक, हाइपार टेन्स'न आरोलाय सोरबानिबा मेलेम गाज्रिनि थं;
बेफोरनि गेसाव खारलिंनाय मोनामनाय
आरो खर' सुबाव मोनलायनाय
बिफां सायाव गाबदों
खुगा ब्लां सिहाबना सिला-सिगुन, दावखा
बेनि थाखायबो हालांथों
हालांथों जाख्रिसेल' अखा
एसिड अखायानो जायाथों हालांथारथोंल'
सुस्राना समायसार होथों सिदला।
-
सोदोमस्रि गैयै समाजाव
जेबो सिनायलायनाय गैयै थासारियाव
गुबुंले हाद्रि-बालानि बार बारनायाव
जानोहागौ मेगना गाज्रि
बेनि थाखायबो हालांथों
हालांथों जाख्रिसे अखा
सिदोब आरो गोगो बार बिलायथों
गावजों गाव सिनायमोन्थों।