भोरे-भोरे कागा बोले रे मोरे अंगना.
खनकि उठल गोरी कलइया में कंगना.
छम-छम-छम छ्मकेले पाँव क पयलिया.
खिलखिला के खिलि गइलीँ मनवां क कलिया.
आज अइहें परदेशी मोरे सजना.
भोरे-भोरे कागा बोले................
मह-मह महकेला घरवा ओसरवा.
किलकेला चहकेला अंगना दुअरवा.
बहके कलाई ना माने मोरा अंग ना.
भोरे-भोरे कागा बोले................
ठुमकेले मनवां के अंगना पिरितिया.
भूलि गईलीं सगरी जमंनवां क रीतिया.
बावरा भइल मन सुधिया हो तन ना.
भोरे-भोरे कागा बोले................
चहके कोयलिया नियर मोरी हो बोलिया.
सुनी-सुनी ननदी मोरी करे लीं ठिठोलिया.
सासुजी कहें तोहें बोले के ढंग ना.
भोरे-भोरे कागा बोले................
पुरुवा पवन शोख छेड़े मोरे केशिया.
कइसे क बरजीं ना माने निरबसिया.
अरे, रे निठल्ला न कर मोहें तंग ना.
भोरे-भोरे कागा बोले................
मन क मयूर नाचे कुहके कोयलिया.
कनवां में अमृत घोरे कागा क बोलिया.
चोरवा ना चोरइहे खुशी क मोरे रंग ना.
भोरे-भोरे कागा बोले................
This poem has not been translated into any other language yet.
I would like to translate this poem
Reading this kind of poems gives a pleasure to heart and gives a smile....loved it...thank u for sharing :)