ಅಜ್ಞಾತ ವಾಸ Poem by PRAVEEN KUMAR Kannada Poems

ನಾನೆಲ್ಲಿದ್ದೇನೆಂದು ನನಗೇ ಗೊತ್ತಿಲ್ಲ,
ನಾನಿಲ್ಲಿದ್ದೇನೆಂದು ಮಾತ್ರ ಗೊತ್ತು;
ಸ್ಥಳದ ಹಿಂದುಮುಂದುಗಳು ಗೊತ್ತಲ್ಲ,
ನಿಂತ ನಾಲ್ಕಡಿ ನೆಲ ಮಾತ್ರ ಗೊತ್ತು.

ಎಡಬಲದಲ್ಲಗಲ ದಾರಿ ದೂರದಲ್ಲಿವೆ,
ದಟ್ಟಡವಿ ಮರುಭೂಮಿ ಕೂಡಿ ನಿಂತಿವೆ ಸುತ್ತ;
ಎಲ್ಲೆಂದೆಲ್ಲೋ ಸಾಗಿದೆ ಕಟ್ಟಡವಿ ಮಧ್ಯದ ದಾರಿ,
ನಿಂತ ನೆಲವೆಲ್ಲಿ ನಿಂತಿದೆ ನಾನು ಕಂಡವನಲ್ಲ.

ನಾನಿಲ್ಲೇಕಿದ್ದೆನೆಂದು ಗೊತ್ತಿಲ್ಲ ನನಗೆ,
ನಾನಿಲ್ಲಿ ತಲಪಿದೆನೆಂದು ಮಾತ್ರ ಗೊತ್ತು;
ಹೇಗೆ, ಯಾರಿಂದ, ಯಾಕೆಂದು ಗೊತ್ತಿಲ್ಲ,
ಕಣ್ಣು ಬಿಟ್ಟಾಗ ನಾನಿಲ್ಲಿದ್ದೆನೆಂದು ಗೊತ್ತು.

ಕಣ್ಣು ಕುಕ್ಕವ ದಟ್ಟಕತ್ತಲೆ ತುಂಬಿರುವಲ್ಲಿ,
ಬಂದೆನೆಲ್ಲಿಂದ ಹೇಳುವವರಿಲ್ಲ;
ಮುಂದಾರಿ ತೋರಿ ನಡೆಸುವವರಿಲ್ಲ,
ಸ್ತಬ್ಧ ನೆಲದಲಿ ನಾನು ಬಂಧಿಯೆಂದು ಗೊತ್ತು.

ಇನ್ನೆಷ್ಟು ಕಾಲವೀಯಜ್ಞಾತವಾಸ?
ಯಾಕಿಷ್ಟು ದೀರ್ಘವೀ ವಿಧಿ ಸೆರೆವಾಸ?
ಬೆಳಕು ಬಂದರೆ, ದಿಕ್ಕುದಾರಿ ತೋರಿ ನಿಂತರೆ,
ಬೇರೂರಿದ ನೆಲಬಿಟ್ಟು ಹಾರಿ ಹೋಗುವೆ ದೂರ.