फैसालि होसोनाय सानबादि Poem by Sun Raja

आंनि गोसोनि सानस्रिफोरा
नख्रांनि अखाफोर बादि
सानसे सोरां लाबोगोन....

रैसुमै रावजों रायदावगोन
गासै भुमनि गोदान रादाब

बिनि गोरा बिखा
सानसे रैरुब जागोन...

सानसे-
बैसुमुथिनि बिखा समायसारगोन
सैथोआ जेराव गोगागोन
अब्ला आं उदां उदां
बेयाव रंजागोन...

सानसे-
आंनि ददेरे ददेरे गोर्लै आगाना
आगान फोलावहरगोन
आरो सोमखोर समायना खानाइया
मोदोमनाय सारफ्रावगोन...

सोरांनि सेर सेर
बियो फैगोन
बि फैनाय बादि
आंबो सानसे सोरां लाबोगोन
आरो लासै लासै
आंबो बि बादियै फैगोन

सानसे-
आंबो सान बादि फैसालि होसोगोन

गुबुनफोरनि बादि
सानसे-
आंनि सिमाङाबो मोगथां जागोन
अब्ला आं
अखाफोर बादि
गोदै मिनिस्लुगोन....

सानसे-
बिफोरो आंनि जिउआव
मोनफा मोनफा हिरा बादि गोजों मोदानगोन,
मोदानफबगोन...