A. Sisizwe B. Sethu C. Sonke Poem by Nkululeko Mdudu

Ukukhula kokhakhayi
Nokukhokhoba komnt' omkhulu,
Kude kuthi ngokugqama kwenkqayi,
Akuthethi kugqola kwengqondo.

Abantu abakhulu
Banezimvi kwanezimvo,
Bambi banezimvu, ngamava.
Vulani iindlebe zindlamafa
Nike niyeke ukuzidlikidla.

Musan' ukuba ngamatakane
Ngokuphum' izithuba.
Zithobeni nibengamathol'
Omthonyama athandekayo.

Bonani amabali
Obuntu nobumbano,
Kungenjalo nyamekelani
Inyaniso nenyameko
Kumanyundululu olutsha.

Mamelani, mamelani,
Mamelan' izandi, zith'
Izimbo zazo zizob' uMzantsi
Ngezisa zomzabalazo.

Thobelani, thobelani,
Thobelan' umthetho
Wentetho yohlanga
Ngazo zonk' izihlandlo.
Nihlangane, ninyangane.

Hlanganani, nyanganani
Ngay' inyanga yohlanga
Lwamahlwempu ahluthayo;
Nakhe isizwe. Nizise uzinzo
Nakwizizwe zobumelwane

Nakh' isizwe soluntu
Olukhuthalele intlalo-ntle
Yehlabathi, ngemihlali,
Neyamahlathi, mihla le.

Ningazilibalang' izalamane
Zolwandle nemimoya;
Ningazilibalanga izinyanya
ZobuMnyama nokukhanya,
Ningalilibalang' inani,
Ningazilibalanga nani.