Amazizi Poem by Anele Potelwa (Unpublished)

</>Mzi kaNdlovu oyaziyo intlupheko,
ekwath'ebunzimeni zabonakal'izivubeko,
wawusaziwa ngelokumfenguza mandulo,
usaziwa ngelokuhlupheka kumlando,
namhla wande ngobukrele-krele,
namhla waziwa ngesizw'esinobubele,
nzala yakho iqaqadekile kuso isithsaba sempumelelo,

Mzi kaLanga osindwe ziintlobo zemithwalo,
wen'ophile kwiintlobo ntlobo zonxunguphalo,
wema womelela kuba wawukwaz'ukunyamezela,
namhla liyabizwa igama lakho,
ziyababazwa zonk'iinzala zakho,

Mzi kaLamyeni omabal'akhanyayo,
zibethil'iindudumo zemka nal'iphahla layo,
zavakal'izingqi zaseThukela kurhox'imibombo,
namhla igazi lakho bubuhle bembali,
namhla inzala yakho bubusi besizwe,

Mzi kaJama ozaziy'iintlungu,
zaziman'ukujama izizwe zingafuni ukwamkela,
namhla singumkhos'isizwe sakho,
kuyimigcobo Ziz'elimnyama neenkomo zalo,
zixhathisil'iinkonde neenkondekazi zikaNgubonde kwelakwaNtu,
umkhulu wogqith'ulwandle ngobunzulu,
usasazekile wogqith'amabalengwe ngokwesizukulwana sakho