Auld Reekie's Ghaists (Scots) Poem by Sheena Blackhall

At nicht Auld Reekie's taen ower bi the deid,
Hauf-hingit Maggie wauks the wynds again.
Mary King's Close, plague rears its ugsome heid

Damnation Alley..lichts glent green an reid,
The ghaists o Burke an Hare bring daith an pain
George McKenzie, judge, stauns drooked in bluid.

Deacon Brodie flichters, derk in deed
The verra flagsteens, fleggit bi his name.
The Sooth Brig vaults a-steer, here bogles breed

Is Major Weir aboot? Coorse wis his creed
Aneth the castle, bagpiper's refrain:
Doon in the derk wi nane tae hark or heed

The meen stauns cauld, stars licht the ghaisties'speed.
Neth the lang shades the Nor Loch fulls again.
Monks, beggars, ootlinns tell their rosary beads.

In Queensberry Hoose aince mair, the guid Scots leid
Is spukken, as in close, street, wynd an lane
Young Robert Fergusson strides oot, braw poet indeed
The past takks ower the cassies, ghaists are freed