Crave Poem by Yohanes Jemaneh

ቀለል ያለ ጊዜ ጠነን ያለ ዘመን
ዐውሎ ያልጎበኘው ተሳቢ ሙሉ ዐየር
ቅርዘትም ጡዘትም ያልሸመቁት ቀዬ
አሳሪም ታሳሪም ያላወሩት ዘዬ
ቀለል ያለ ወግ ከንፈር ግጥም ሳቅ
ቀለል ያለ ስም ለጥሪ ማይርቅ
ቀለል ያለ ልብስ 'ማይከብድ ገላ
ቀለል ያለ መልክ የማይጣራ
ያልጋመ ቀለም ብሌን ያልናኘ
ዐደይ ቅብ ፍካት ሠርክ ያልተገኘ
ያልጮኸ ብርሐን ዐይን ያልወጋ
ያልጨለመ ያልተዘጋ
ጠነን ያለ ወዝ ከቶ ያልተብጫጫ
እጅግም ሳይፈዝ እንደ ግራጫ
ግማሽ ጠርሙስ ወይን ያልተተፋ
ግማሽ እንጀራ ያልቆነጠጠ
ለወግ የሚተርፍ ያላጠጠ
ቀለል ያለ ልብ ለጸብ ጥላቻ
እጅግ ያልቆመ ለፍቅር ብቻ
ስክን ያለ ርምጃ የተገራ መንገድ
ቀለል ያለ ጽሑፍ ለንባብ የማይከብድ
ልዝብ አንደበት እሳት ያልላሰ
ያልተለጎመ ያልተኮፈሰ
ምጥን ቁመና
ደልዳላ ገላ
|ያልገላወደ ያልመሰረ
ያልተንጠረበበ ያልተጠረበ
ያልሰባ ያልተላገ|
ልከኛ ዕውቀት ያልከረረ - መንገድ ያልወጣ
ወላንሳ ጠባይ ያልቀለለ - ካሉት ያልታጣ
ታዛዥ ሥሜት የተገራ
ካጋር ንበት የተሠራ
ሣር ለበስ ቅያስ በቅርብ የቀና
ግን የተሟሸ በስክን ዳና
እስኪ ጠቁሙኝ መልካም ጎዳና
ከሕልሜ ሚያደርስ ያለሙን ቃና፡፡