Daniw A Nangtukay Kaniak Poem by Mario Tejada

Nasnebannak
Iti luang
Nga imbatim

Pinunnonak dayta a luang

Agtamtampisawak
Iti ulimek
A pinanglapunosmo kaniak

Dayta ti umel a pannakinaigko

Daytoy puso
Ikansionna latta
Ti daan a dayyeng ti bulan

Dayta umel nga ayug ti mangbibiag kaniak

Ti angesko
Say-upenna latta
Ti banglo nga imbatim iti kudilko

Dayta ti mangtagibi iti namnamak

Tunggal rabii
Mangitanemak ditoy pusok
Iti lua para kenka

Dayta ti mangep-ep iti waw ti pusok