Deremen Poem by Ferdinand L Quintos

Malangwer ya ansakket
iniguban pian untan ondeket
ed apoy na sinigat a kawayan,
sinalor ed batya’n dati’n panpepesakan.

Ansakket ya iniguban
niluba ed eges na taltagan,
pian say butil et dia’d osang nasian
ed belat na alo’n mansusublayan.

Aluba’n ansakket ya iniguban
inpisok ed lasong pian degasan,
binayo’y alo ed kumpas na isa, dua, talo
pian anggapo’y napatogan ya bumabayo.

Adegasan ansakket ya iniguban
inakir nanlapu ed lasong pian taepan
ibantak so tegap, uring tan antokaman
natilak la’y deremen ya sankasamitan.

Deremen a kayemkayem inpireg,
inigar so niog insan pinespesa’y gata,
inpaluag ed talyasi insan minasamitan
dereme’y inlaok, inlubi la so nagmaliwan.

Andeket a inlubi, niliwliw, inaon,
inpalatas ed bigao’n inapisay bulong,
inatado’y pakuadrado, duga-duga’n isubo,
inawit nen nanay ed tindaan piano ilako.

Andeket ya inlubi agano’n alako,
si nanay agto nasabsabaan so liket to,
kuarta’n nanlakuan na inlubi ya andeket,
mamaliwawa’y arapen mi’n ambilunget.