Door Ki Chaahat Poem by Shambhu Dan Mehru

Ek baat kahna chaahta hu
ek chitthi likhna chahta hu
par
na koi aisa pata
na mere padous me aisa aadmi
na hi paas
na hi door
aisa koi hai
jo sachchi baat sun sake
sunkar
na hanse
dard ko uss gaharai tak pacha sake
to fir kyo ek
jhoothi kavita gadhu
aur kavita bhi to
ab door ki chaaht hai
mere liye
tabhi to roz ghol leta hu
meri baat ko
apne aap ko
aur pee leta hu
itani-itani
ki
baat sharab ho jaye
aur har baat me
sharab ki boo aaye
log
naak- bhou sikoudein
unhein bhi jab sahan nahein hogi
to pich-pich
thook denge
tab mein kahunga
pavitr hu, paap karke bhi
aur
cigarette ka bacha hua tonta
beech sadak fenk dunga aadat hai
aadat puraani hoti hai
usake liye koi bura nahein kahta
bura to jab banana hoga
jab
tonte ko dalne ki jagah
dhundhne lagoge
na paoge aisi jagah
haath jal jayega
hath bachana hai to
fenk tonta sadak ke beech
jalega to dusaron ka peyr
apana hath to bach jayega
dusari cigarette jalaane ke liye
khalk ka usool hai
jhooth ko akela kar dalna
sub to samuhik sach bolte hein
bade sach ka ansh hona hi sach hai.


(khalk= duniya)