Ezants'Embo! ! Poem by Anele Potelwa (Unpublished)

Ezants'eMbo mawethu!
Ndibon'usizi kwigaz'elimnyama lethu
Iintsana zithwel'ubunzima
Kwintlupheko kuzo kwanqab'isidima
Kuzinyembezi kumanina
Kuphel'amaqhinga kwand'amaqhina

Ezants'eMbo mawethu!
Yizani nibone mzi wakowethu!
Kwezo ngqele kwezo ntaba
Ndibon'ubukhoboka busasazek'okweentsiba
Ndithwaxwe sisazela novelwano
Kwisizwe sibethwa luphango
Kakade nje zith'iimbongi kwakonakele
Kub'ithumbu emntwini lalizonwabele

Zehla iinyembezi kubafazi
AmaMfengu ehlaselwe kukungazi
Yabe yona imfazwe sele igqithile
Isikhukhula sashiya iintsapho ziphelile
Yini na ntsapho zaseMbo!
Ukuba nishiyeke nani ningenazimbo

Ezants-eMbo mawethu!
Nalo lichithek'igazi lakowethu
Kwathi kanti eso sisiqendu
Esafundis'umthinjana sashiy'amendu
Namhla wena Mfengu ndini uyayazi intlupheko
Kumathaf'aseDutywa usingath'elakho itheko
Kwimisitho yaphesheya pha! KweNciba
Uhleli ngovuyo namaGcaleka kungekho sixhiba

KubaThembu!
kumaRharhabe!
KumaMpondo wande ilizwe lonke
Wamkelekile nakwindlu kaZwelonke
Umanyene ngothando nentlutha!
Kumathaf'aseNqamakwe naseTsomo angenokwehluthwa

Namhla umkhulu kwesikaPhalo udubula ungethi
Inzala yakho nayo isingath'ubutyebi
Nditsho kuwe Miya nditsho kuweBhele
Nditsho kuweRhadebe nditsho kuweTolo

Nditsho kuni mzi wamaZizi
Wandile nawe namhla Jama kaSjadu
Ezants'eMbo mawethu!
Kulapho sivela khona esinye isizwe sakowethu!