Hiram Na Pangarap Poem by Jhane Reyes

Ang pangarap na hinahangad
Na nais maabot at matupad
Hindi pag-aari at hiram na matatawag
Sapagkat inamot lang sa ibang palad

Kay daling mangarap ngunit kayhirap abutin
Kaya ang sa iba ang nagawang hangarin
Sa pag-aakalang tagumpay agad kakamtin
Hindi alintana kung makasakit ng damdamin

Ngayo’y nasa kamay na ang hiram na pangarap
Na kay bilis naabot at na angking ganap
Naging sapat ba ang kaligayahang nalalasap
O dulot ay kalungkutan na siyang nagpapahirap

Lahat ng nilalang ay biniyayaan
Nang sariling isip, talento’t katalinuhan
Upang paunlarin at mapagyaman
At hindi pagpapairal ng kasakiman