ଲେଖୁଛି ମୁଁ I Am Writing Poem by Gajanan Mishra

ନିଆଁ ହୁଳା
ଗଜାନନ ମିଶ୍ର

କାହିଁକି ଲେଖୁଛି ମୁଁ
ଏତେ ସେତେ ଶତ୍ରୁଙ୍କ ପରି
ବନ୍ଧୁଙ୍କ ପରି ହଟହଟା ହୋଇ
ବଜାରର ଘୋ ଘା ଭିତରେ
ମତେ ଜଣା ନାଇଁ।
କିନ୍ତୁ ଲେଖିଲାବେଳେ ଶବ୍ଦଙ୍କୁ
ବୋଲ ମନେଇଛି ଏମିତି ବି ନୁହେଁ।
କାହିଁକି ଲେଖୁଛି ମୁଁ
ଅଯଥା ଶତ୍ରୁ ତିଆରି କରିବାକୁ କି!
ମୋ କଥା ଲେଖୁଛୁ କିଆଁ କହି
ଶୁଧାବକା କରିଚାଲିଛନ୍ତି ଥୋକେ,
ଆଉ ଥୋକେ ଡରାଣଦେଇ ଚାଲିଛନ୍ତି
ଏ ସହରରୁ ନିକାଲି ଦେବେ କୁଆଡେ!
କାହିଁକି ଲେଖୁଛି ମୁଁ
ଜାଣିଯାଆନ୍ତି ଯଦି ଆଉ କି ଲେଖନ୍ତି?
ଏତକ ଜାଣିବାକୁ ସିନା ସମୟ ସାରି ଆସୁଛି
କାହିଁ କୋଉ ଯୁଗରୁ ଆଉ ଏମାନେ ସବୁ
କେତେ କେତେ ରୂପରେ ମୋ ଚାରିଆଡେ
ଘୂରିବୁଲୁଛନ୍ତି ପୋଡିହେବାକୁ ନିଆଁ ହୁଳା ଉପରେ
ପୋକ ପତଙ୍ଗ ପଡିଲା ପରି।
କାହିଁକି ଲେଖୁଛି ମୁଁ
ପ୍ରଶ୍ନ ଯେମିତି ଅବାନ୍ତର, ଉତ୍ତର ବି ।

ତପୋବନ, ଟିଟିଲାଗଡ, ବଲାଙ୍ଗିର
24/8/2019