Insomnyak Poem by Alice Cuenca

bulok sa kagabhi-on nangalumpag
ngadto sa tabon-tabon
nga nakiglimbasog nga mohayat
kay ang lugas sa adlaw
misil-ip na sa kapunawpunawan
ug mibukhad sa balilihan

nahimugso na usab ang bidlisiw
nagsubay sa kasumo sa
inadlaw'ng panginabuhi...

pagbating bug-at, napukan
hago sa kahaw-ang
kining lang-at nga gilikosan
sa walay-timik nga daklit

nataliwala sa batunaw'ng nanibuok
sa nagkalaing-laing kolor
napugdaw sa ilawom sa adlaw;
nagpaanod sa nalanay'ng bulok

ug sa dihang miungaw ang kilumkilom
gilamoy sa usab ako sa kangitngit...