Intlonipho Poem by Anele Potelwa (Unpublished)

Zakuphel'iintsuku,
Lakutshon'ilanga,
Iintsunguzi ziphembelela emandleni,
Ixesha lindishiy'ematyeni,

ndakufun'isonka endasiphiwa emaZizini,
ndakukhumbula ubisi endalusezwa libele lentombi yasemaTolweni,
mna ndodwa ndakukhumbula amazwi endawanikwa lixhewukazi lasebaThenjini,
ndivume ingoma endayifundiswa yinkondekazi yasemaZangweni

lakufika ixesha lamaxesha,
apho ndakube ndisazi umehluko komdala nomtsha,
apho ndakube ndisazi umehluko kumlisela nomthinjana,
apho ndakugqisha ndivume ukuba intlonelo yintlonelo,
ndibike kumazwe nesizwe ukuba intlonipho yintlonipho,

lakukhanya ilanga,
ngakum zizakuvula izibhakabhaka,
inene kuzakucaca impumelelo endiyifungelweyo,
ikant'emhloph'ehlungwini,

elam lelokungqiyama ngentlonipho,
ndandule ukucondoba ngentlonelo,
kuba ngamayeza lawo endawasezwa ngabadala,
kuba kaloku lamachiza awamadala koko andandisela iintsuku zama kulomgquba ukrakrayo,

isitshixo sam sokuvul'amasango,
ibhayi lam lokombatha ndithozame,
intonga yam yokusimelela,
kuthwa yintlonelo,
yona iyintlonipho