Lento Isiko Poem by Anele Potelwa (Unpublished)

Sixhobo sokukhusel'uluNtu,
Lunxulumano lamagorh'akowethu,
Ndixela icamagu lezinyanya zamawethu,
Bubuhle bomz'ontsundu,

Lento isiko akupucwa ngalo,
Lento isiko akuqashiswa ngalo,
Lento isiko alunqunquthwa kwimidlalo,
Lento isiko alilafu-lafuzwa nakwincoko,

Ngumthamo wembali yakwaNtu,
Yintlakohlaza ngobuhle kubaNtu,
Yinqawe engacimiyo kumaxhego,
Lulwazi lokurhub'izizwe kwisizukulwana,

Lento isiko ayingogqaphu weentsana,
Lento isiko ngumlilo odwanguzayo,
Lento isiko asingomxhentso wamagqirha,
Lento isiko lingenguwo umtshotsho womthinjana,

Ngumrhubhe ngobuhle nokukhazimla,
Yimvulasifuba kwimbongi ngokuthozama,
Ngumzila wobomi ongenabo ubuhandiba,
Kuba ubungozi balo buyakwazi nokuhlokondiba,
Libhude wena! ! ! !

Lento isiko asiyondlalo!
Lento isiko asiyondlalo!
Kumkela ubaz'amehlo mthinjana,
Lumkela uvul'iindlebe mlisela,
Kuba lento isiko ayisosithethe,
Lento isiko ayingomdlalo.